බම්බලපිටිය Unity Plaza සුපිරි වෙළෙඳ සංකීර්ණය තොරතුරු තාක්ෂණ මධ්‍යස්ථානයක් ලෙස ප්‍රතිසංවර්ධනය කරනු ලබනවා.
මෙහි ප්‍රතිසංවර්ධන කටයුතු සිදු කෙරුණේ රාජ්‍ය සහ පුද්ගලික අංශයේ ආයෝජන වැඩපිළිවෙළ යටතේයි.
ප්‍රතිසංවර්ධන කෙරුණු Unity Plaza වෙළෙඳ සංකීර්ණය විවෘත කිරීම නාගරික සංවර්ධන හා නිවාස අමාත්‍ය ප්‍රසන්න රණතුංග මහතාගේ ප්‍රධානත්වයෙන් ඊයේ (07) දින සිදු කරනු ලැබුවා.
Unity Plaza වෙළෙඳ සංකීර්ණය කොළඹ නගරය කේන්ද්‍ර කර ගනිමින් පිහිටා ඇති ප්‍රධානතම වාණිජ ගොඩනැගිල්ල වන අතර, මේ වනවිට මෙය සියලු තොරතුරු තාක්ෂණ අවශ්‍යතා එකම වහලක් යටින් සපුරා ගැනීමේ හැකියාව ඇති ප්‍රමුඛතම සාප්පු සංකීර්ණය බවට පරිවර්තනය වී තිබෙනවා.
මෙරට තොරතුරු තාක්ෂණ ක්ෂේත්‍රයේ සංධිස්ථානයක් ලෙස හැදින්විය හැකි Unity Plaza, නවෝත්පාදන ප්‍රවර්ධනය සදහා රාජ්‍ය හා පෞද්ගලික සහයෝගීතාවයට හොදම උදාහරණයක්.
1982 වසරේ ජුනි මස 25 වනදා ඔනාලි හෝල්ඩින්ස් ප්‍රයිවට් ලිමිටඩ් සමාගම විසින් Unity Plaza ආරම්භ කර තිබෙන අතර, වර්තමානයේ මෙහි 51% ක කොටස් අයත් මෙම සමාගමට අයත් වනවා.
වර්තමානයේ කැපී පෙනෙන පරිවර්තනයකට ලක්ව ඇති මෙම සුපිරි වෙළෙඳ සංකීර්ණය, අලෙවිසැල්වලින් යුතු මහල් 5 කින් සහ කාර්යාල පහසුකම්වලින් යුතු මහල් 5 කින් සමන්විතයි.
